Sir 50

1 Симон сын Ониин иерей великий, иже в животе своем сострои дом и во дни своя утверди церковь. 2 И тем основана бысть высота сугуба, воздвижение высоко ограждения церковнаго. 3 Во дни его умалишася сосуди воднии, ров яко моря окружение. 4 Блюдый люди своя от падения и укрепивый град во обседении. 5 Коль прославлен бысть в сожителстве людий, во исходе дому катапетасмы? 6 Яко звезда утренняя посреде облаков, аки луна полна во днех своих, 7 яко солнце сияющее на церковь Вышняго, и аки дуга светящаяся на облацех славы: 8 яко цвет шипков во днех весенных, яко крин при исходищих воды, яко стебло ливаново во днех жатвы: 9 яко огнь и ливан на огнищи, 10 якоже сосуд злат искован, украшен всяким камением многоценным, 11 яко маслина износящая плоды и яко кипарис возрастаяй до облак. 12 Внегда взимати ему одежду славы и облачатися ему в совершение хваления, в восхождении олтаря Святаго прослави одежду святыни. 13 Внегда же приимати части от рук иерейских, и той стояше при огнищи олтаря: 14 окрест его венец братии, яко прозябение кедрско в Ливане, и окружиша его яко стеблие финиково: 15 и вси сынове Аарони во славе своей, и приношение Господне в руках их пред всем собором Израилевым. 16 И совершение служителей на олтарех, еже украсити приношение Вышняго Вседержителя, 17 простре на чашу возлияния руку свою, изгнете от крове гроздныя, возлия на основание олтаря в воню благоухания Вышнему всех Цареви. 18 Тогда возопиша сынове Аарони, трубами коваными вострубиша, услышан сотвориша глас велик на память пред Вышним. 19 Тогда вси людие обще приспеша и падоша ницы на земли поклонитися Господеви своему Вседержителю Богу Вышнему: 20 и восхвалиша певцы гласы своими, в велицем гласе усладися пение: 21 и помолишася людие Господу Вышнему молитвою пред Милостивым, дондеже совершися красота Господня, и службу свою скончаша. 22 Тогда сошед воздвиже руки своя на весь собор сынов Израилевых, дати благословение Господеви от устен своих и именем Его похвалитися. 23 И повтори поклонение прияти благословение от Вышняго. 24 И ныне благословение Бога всех, велия творящаго единаго всюду, возносящаго дни нашя от ложесн и творящаго с нами по милости Своей: 25 да даст нам веселие сердца, и да будет мир во дни нашя во Израили якоже дни века: 26 да уверит с нами милость Свою и во дни своя избавит ны. 27 Два языка омерзеста души моей, а третий несть язык: 28 седящии на горе Самарийстей и Филистимляне, и людие буи живущии в Сикимех. 29 Наказание разума и ведения начерта в книзе сей Иисус сын Сирахов, Иерусалимлянин, иже одожди премудрость от сердца своего. 30 Блажен, иже в сих поживет, и иже я положит в сердцы своем, упремудрится. 31 Аще бо сотворит сия, ко всем укрепится, яко свет Господень след его.